தமிழ்நாடு, கேரளம், மேற்கு வங்காளம், அசாம் மற்றும் புதுச்சேரி ஆகிய ஐந்து மாநிலங்களில் நடைபெற்ற சட்டமன்ற பொதுத் தேர்தல்கள் வெற்றிகரமாக நிறைவடைந்துள்ளன. இந்த தேர்தல்களின் வாக்கு எண்ணிக்கை வருகிற மே 4-ஆம் தேதி திங்கட்கிழமை காலை முதல் நடைபெறவுள்ளது. இந்த நிலையில், தேர்தல் முடிவுகளை பொதுமக்கள் விரைவாகவும் துல்லியமாகவும் அறிந்து கொள்ளும் வகையில் இந்திய தேர்தல் ஆணையம் புதிய இணையதள வசதியை அறிமுகப்படுத்தியுள்ளது. https://results.eci.gov.in/ என்ற இணையதள முகவரியின் மூலம், வாக்கு எண்ணிக்கை தொடங்கும் காலை 8 மணி முதல் மாநில வாரியாகவும், தொகுதி வாரியாகவும் தேர்தல் முடிவுகளை உடனுக்குடன் அறிந்து கொள்ளலாம் என தெரிவிக்கப்பட்டுள்ளது. இந்த இணையதளம், நேரடி (live) தரவுகளின் அடிப்படையில் தொடர்ந்து புதுப்பிக்கப்பட்டு, ஒவ்வொரு தொகுதியின் நிலவரத்தையும் தெளிவாக வழங்கும் வகையில் வடிவமைக்கப்பட்டுள்ளது. இதன் மூலம் பொதுமக்கள் மட்டுமின்றி அரசியல் கட்சிகள், வேட்பாளர்கள் மற்றும் ஊடகத்துறையினரும் துல்லியமான தகவல்களை ஒரே இடத்தில் பெற முடியும். மேலும், டிஜிட்டல் வசதிகளை விரிவுபடுத்தும் நோக்கில், ‘ECINET’ மற்றும் ‘Voter Helpline’ எனும் செல்போன் செயலிகளின் மூலமும் தேர்தல் முடிவுகளை உடனுக்குடன் தெரிந்து கொள்ளும் வசதி ஏற்படுத்தப்பட்டுள்ளது. இந்த செயலிகள் Android மற்றும் iOS தளங்களில் கிடைக்கின்றன என்பதும் குறிப்பிடத்தக்கது. வாக்கு எண்ணிக்கை நடைபெறும் நாளில் வெளிப்படைத்தன்மை மற்றும் தகவல் அணுகல் சுலபத்தன்மையை உறுதி செய்யும் வகையில் இந்த புதிய முயற்சியை தேர்தல் ஆணையம் மேற்கொண்டுள்ளது. இதன் மூலம், தேர்தல் செயல்முறையின் முக்கிய கட்டமான முடிவுகள் அறிவிப்பு பொதுமக்களுக்கு நேர்மையான முறையில் எளிதாக கிடைக்க வழிவகை செய்யப்பட்டுள்ளதாக அதிகாரிகள் தெரிவித்துள்ளனர். செய்தி: ஆசிரியர் & வெளியீட்டாளர்